វដ្តជីវិត
- កើតជាមនុស្សគ្មានគោលដៅដូចក្បូនអណ្តែតទឹក
ខំស្ទុះស្ទាតាំងពីព្រឹកដល់ថ្ងៃត្រង់ចូលយប់ស្ងាត់
- មេឃងងឹតចូលមកដល់ខ្យល់បក់រផាយរផាត់
ដើរវារលូនមិនដឹងបាត់ព្រលឹងហោះទៅណាទេ ។
- ខោអាវសើស្បៃក៏មិនមានរូបដូចជាប្រេត
ចូលឆ្នាំផល្គុនចេត្រអស់ពួកសត្វប្រេតមិនស្គាល់ពេល
- មនុស្សាស្រែកអ៊ូអរខ្លួនមិនស្គាល់នរណាគេ
ចង់ដឹងទើបដើរចូលគេជេរវាយដំដូចសត្វឆ្កែ ។
- កាលនៅរស់គាត់ស្អប់មនុស្សប្រភេទនេះខ្លាំងណាស់
ស្មានមិនដល់សោះក៏ប៉ះខ្លួនឯងព្រោះមិនចេះថែ
- រើសអើងឈ្នានីសអ្នកដទៃបុណ្យត្រូវបានប្រួលប្រែ
ដោយសារគ្មានពុកម៉ែនៅចាំបីបាច់ថែរក្សា ។
- ជីវិតទៅមុខមិនបកក្រោយមិនពិចារណា
ខ្លួនមិនដែលមានមុទិតា ករុណា មេត្តា
- ថាមនុស្សក៏មិនមែនដើរស្វែងរកម្ហូបអាហារ
គ្មានបញ្ញាទុកធ្វើការគ្មានអ្នកណាទីពឹងឡើយ ។
- ខ្លួនស្គមស្គាំងដូចសត្វគីង្គក់ដើរដួលអត់អីឆី
មនុស្សាចិត្តអប្រិយឃើញហើយធ្វើឫកកន្តើយ
- ឈឺជិតស្លាប់មិនដឹងថ្ងៃណាស្លាប់ឈឺមិនដែលស្បើយ
ទន់ជើងដើរដួលយ៉ាងខ្សោយគ្មាននរណាអើពើទេ ។
- ដេកដួលសន្លប់បាត់ស្មារតីមួយសន្ទុះទៅ
មនុស្សច្រើនជាសត្រូវវាយដំជេរស្តីទាំងទ្វេ
- សន្លប់បាត់ទៅនៅតែទើសច្រមុះមាត់ភ្នែកគេ
ខ្លួនខ្មៅរអិលដូចភេមិនដឹងនៅថ្ងៃណាស្លាប់ ។
- ងើបឡើងឃ្លានយ៉ាងខ្លាំងក៏ទៅលួចនំគេមកឆី
ម្ចាស់គេតាមទាន់ជេរស្តីហើយរត់ត្រូវគេបានចាប់
- ដល់ពេលគេស្អប់ខ្លាំងពេកនោះគេប៊ិះនឹងសម្លាប់
ខឹងខ្លាំងចង់តែដេញកាប់ឲ្យរលត់ក្ស័យសង្ខារ ។
- គេខ្ពើមគេធាក់គេឃើញតែមិនយកភ្នែកមើលឡើយ
ដេកលើផ្លូវអត់ខ្នើយកើយក្តៅត្រជាក់អត់វាចា
- ស្គមទៅៗគ្មានអ្នកណាឃើញពីឈឺសញ្ញា
គាត់គិតឃើញឈឺចិន្តាទើបនឹកស្តាយថាខ្លួនខុស ។
- សំណាងអាក្រក់បានជួបនិងឃើញជាការពិតច្បាស់
កើតឡើងមិនអាចប្តូរផ្លាស់ទោះបីចាស់ក្មេងស្រីប្រុស
- តាំងពីក្មេងកើតចេញពីផ្ទៃម្តាយមកលូតលាស់ដុះ
មានទាំងភ្នែកទាំងច្រមុះថែមកាយវិការគ្រប់ដប់ ។
- តែឥឡូវវាសនាត្រូវបានកំណត់បាត់ទៅហើយ
ដាច់ដង្ហើមជាចម្លើយជូនទៅឲ្យអ្នកដែលស្អប់
- ម៉ូតូបុកកិនពីលើព្រោះជាមនុស្សឆ្កួតឡប់
ព្រោះជាថ្ងៃដែលត្រូវចប់ឲ្យបានស្ងប់នៃជីវិត ។